Si Irvin Maaño Alcala ay namulat sa larangan ng pulitika dahil sa pagbabagong  dulot  ng masidhing paglilingkod ng  kaniyang ama na si Congressman Proceso  Procy J. Alcala nang manungkulan ito bilang kinatawan ng Ikalawang Distrito ng Quezon. Ito ang nagmulat sa kanyang murang edad sa tunay na kalagayan ng ating bayan kung kaya't sa edad na 33 ay tinanggap nya ang hamon na ipag-patuloy ang nasimulan ng kanilang pamilya.

Pangalawa at nag-iisang lalaki si Irvin sa tatlong anak ng mag-asawang Engr. Proceso Jaraza Alcala at ng kanyang may bahay na si Corazon Asuncion Gocon Maaño. Nag-aral at nakapagtapos ng elementarya at sekondarya si Irvin sa Maryhill Academy mula 1990 hanggang 1994 at kursong Inhinyero Sibil sa Mapua Institute of Technology taong 2000.

Napangasawa ni Irvin si Mimilanie Tadiosa at mapalad na nabiyayaan ng dalawang anak na sila Theoden Benedict T. Alcala, 4 na taon at Thor Benedict T. Alcala, 5 buwan.

Hindi lumaki sa luho si Irvin sa katunayan bata pa lamang siya ay natuto na syang maging masinop sa pamamagitan ng pagpasok bilang timekeeper sa kanilang maliit na kumpanya tuwing bakasyon at ang kanyang kinikita mula dito ang kanyang iniipon upang maipangbili ng bagong sapatos na pamasok sa pagbubukas ng klase sa kasunod na taon.

Nang makapagtapos siya ng kolehiyo ay agad niyang inasikaso ang kanilang munting negosyo upang makatulong sa kanyang pamilya.

Dahil sa pagkakaluklok bilang kinatawan ng kanyang ama, hindi nalingid kay Irvin ang mga pangangailangan ng kanyang mga kababayan na lalo pa niyang naramdaman ng maging aktibo siyang kasapi ng Rotary Club of Lucena South. Dito ay binigyang pansin nya ang Serbisyo Publiko at itinuon ang kaniyang atensyon sa lahat ng programa ng nasabing grupo upang makapaglingkod sa mga kapos palad nating kababayan.

Ang mahigit walong(8) taon niyang boluntaryong paglilingkod sa publiko ang siyang nagpasidhi sa kanyang pagnanais at nagtulak sa kanya upang tahakin ang landas ng pulitika.

Ang kanyang paniniwala sa paninindigan na sinimulan ng kanyang ama na tapat na pagsilbihan ang mga mamamayan ng Ikalawang Distrito ng Quezon ang kanyang naging gabay upang ipagpatuloy ang serbisyong bayan.

Dahil kapag ALCALA, SUBOK NA!

Ako po si Irvin Alcala, kumakandidato sa  pagka kongresista sa Ikalawang Distrito ng Quezon ay dumudulog sa inyo na ang may pagmamalasakit. Kung inyo pong mamarapatin ang inyong abang lingkod ay makapagsilbi sa inyo bilang kinatawan ng ating distrito, ito po ang mga programang nais kong pag ukulan ng pansin sa panahon ng aking termino upang masiguro na may sapat na pagkain ang hapagkainan ng bawat pamilya sa ikalawang Distrito ng Quezon.

SAN ANTONIO: Pagbuo ng isang organisasyon pribado man o gobyerno na siyang mangangasiwa upang tumaas ang antas ng lahi ng mga alagaing hayop. Pagpapatayo ng mga nursery para sa mga pananim at pagbibigay ng mga pataba sa mga alagang hayop.  Pagpapagawa at pagsasaayos ng San Jose National High School upang ilapit ang murang edukasyon sa mga mag-aaral dito.

DOLORES: Layunin ko na maging isa sa mga sentrong pang turismo ang bayan ng Dolores sa bansa. Palalakasin natin ang Eco-Tourismo sa pamamagitan ng pagtatalaga ng mga tour guides at porter kaalinsabay ang pagpapatupad ng Banahaw Bill upang mapangalagaan ang ating likas yaman. Pagpapaigting at pagpapalawak ng mga value crops production.

TIAONG: Dahil sa pagkakatatag ng Southern Luzon State University sa tulong ni Cong. Procy Alcala, minarapat kong suportahan at mas lalong palakasin ito ng sa gayon ay maging isa sa mga sentrong pangedukasyon sa lalawigan. Patuloy na pagtitibayin at susuportahan ang mga scholars para sa paglinang ng kanilang talino at magandang buhay. Paghikayat ng mga bagong mamumuhunan na magbibigay ng hanap buhay at libangan kaakibat ng pagiging sentro ng edukasyon nito.

CANDELARIA: Mapanatiling Desiccated Capital ng mundo ang bayan ng Candelaria. Sapagkat marami pa din sa mga kababayan natin sa Candelaria ang umaasa sa pag niniyog. Hinahangad ko din na maging isa sa mga sentrong pangkalusugan ng lalawigan ang bayan Candelaria. Mula sa pagiging Candelaria Municipal Hospital nito ay maging isang ganap na District Hospital ang nasabing pagamutan upang matugunan ang agarang pangangailangan ng ordinaryong mamamayan tulad ng mga simpleng karamdaman at ng hindi na sila kailangan pang lumuwas ng Maynila. Hinahangad din natin na madagdagan ang mga kagamitan ng nasabing  ospital.

SARIAYA: Malayo na nga ang narating ng Sentrong Pamilihan, maganda na ito at matatag. Panahon na para pag yamanin at isulong ang industriyalisasyon sa pamamagitan ng pagpapatayo ng mga Processing Plants upang mapanatiling sariwa at dekalidad ang mga produktong gulay dito. Dahil mahigit sa 40% ng ating kababayan ay umaasa sa pagtatanim. Nais ko ring mapabilis na mapatapos ang Eco-Tourism Road upang maisulong ang agro-industry, at ang hinahangad natin na magkaroon ng Sabansaang Bagsakan ng Produktong Pang-agrikultura. Pagpapagawa ng karagdangang tulay sa Sariaya ng sa gayon ay maiwasan ang matinding daloy ng trapiko sa lugar at madaling makarating sa paroroonan.

LUCENA: Paghikayat ng mga bagong investors upang mamuhunan at lalong mapaunlad ang bayan. Pagkakaroon ng dayalogo sa mga kasalukuyang negosyante maliit man o malaki upang matulungan sila sa kanilang pagasenso. Kasama na dito ang pagsasaayos at pagpapasigla ng Lucena Fishing Port para sa mas madaling kalakalan ng produktong pandagat.

Bagamat madami na ang nakapagtapos ng kolehiyo mahigpit pa din ang labanan sa paghahanap ng trabaho. Dahil dito ay makikipag ugnayan tayo sa TESDA upang mahubog ang mga kakayahang pang bokasyonal at teknikal ng mga mamamayan at pagpapalakas din natin ang Alternative Learning System (ALS).

Alam nating na matagal na ding panahon na ipinaglaban ng ating mga kababayan ang kanilang karapatan para sa maayos na tahanan. Kung kaya't tutulungan nating makahanap kung hindi man ay maisaayos ang kinatitirikang lupa ng mga Urban Poor Communities.

Maliban sa mga nabanggit kong bigyang prayoridad sa bawat bayan, ito ang mga proyektong nais kong bigyang pansin:

EDUKASYON

• Pagpapatuloy ng programang Procesong Gulay o Organic Farming sa mga eskwelahan ng Ikalawang Distrito ng Quezon.
• Dahil sa mataas na dropout rate sa Pilipinas na 28% noong 2009, tuloy ang pagpapalakas natin ng Alternative Learning System ng DepEd at pagsuporta sa TESDA para sa kakayahang teknikal at bokasyonal ng mamamayan ng Distrito.
• Pagpapatuloy at pagdaragdag ng suporta sa mga iskolars na sa ngayon ay bumibilang na sa mahigit walong daang (800) estudyante.
• Pagpapanatili sa kultura at katutubong sining natin dito sa Quezon. Pagtuklas at paglinang sa mga kabataang may potensyal na galing sa larangang ito upang lalong mahubog at maging daan sa pagbubukas ng marami pang oportunidad.
• Paglinang  sa mga kabataang may potensyal sa larangan ng isports o palakasan upang magin daan para makakuha sila ng scholarship sa mataas na paaralan
• Pagtatayo at pagsasaayos ng mga Paaralan gayun din ang pakikipagtulungan sa mga munisipyo para makapagpatayo ng mga silid paaralan. Dahil ang kabataan ay mas gaganahang makapag isip kung may mas maayos na silid aralan.

AGRIKULTURA

• Pagpapalawig at pagsasaayos ng mga irigasyon sa mga lupang sakahan.
• Pagpapatuloy ng organikong pamamaraan ng pagsasaka upang makilala ang gulay ng taga Quezon na bukod sa mura ay wala pang lason.
• Pakikipagtulungan sa Philippine Coconut Authority para sa Coconut Rehabilitation. Ayon sa statistika 20 milyong Pilipino ang nakikinabang sa pagniniyog at kabilang dito ang ating mga kadistrito.
• Pagpapaigting ng programa sa Aqua Culture sa mga Barangay na malapit sa dagat at mga ilog.

KALUSUGAN

• Pagsasagawa ng Feeding Programs sa pakikipagtulungan na rin sa mga NGO's, sangay ng pamahalaan, at mga eskwelahan. Dahil kung ang bata ay malusog mas madali niyang maiintidihan ang tinuturo sa kanya sa paaralan.
• Paglalagay ng regular na pondo sa mga pampublikong ospital tulad ng Philippine Children's Medical Center, East Avenue Medical Center, Philippine General Hospital, National Kidney Institute, Philippine Heart Center, Philippine Lung Center, upang makatulong ating mga kababayan upang mabigyan sila sapat na atensyong medikal.
• Pagpapalakas ng mga Barangay Health Workers sa pamamagitan ng pagbibigay ng dagdag kaalaman at gamit.

LINGKOD PANLIPUNAN/ SOCIAL SERVICES

• Pagdaragdag ng mga miyembro at benepisyo ng Green Card.
• Programa para sa mga Senior Citizens.
• Paganib sa mga botika para makakuha ng discount para sa mga miyembro ng Green Card.
• Pagpapalakas at pagbuo ng mga Kooperatiba.

IMPRASTRAKTURA

• Patuloy na pagpapagawa at pagsasaayos ng Farm to Market Roads.
• Pagbutas sa mga kalye na maguugnay sa mga Baranggay upang maging madali ang pag byahe ng mga produkto.
• Pagaayos ng daan sa Sariaya dahil sa napapansin nating paglala ng trapiko sa lugar.
• Pagsasaayos ng mga tulay.

LEGISLATIVE AGENDA

Batid ng inyong lingkod na ang tunay na trabaho ng isang kongresista ay maghain ng batas sa Kamara na makakatulong sa mamamayan ng Ikalawang Distrito:

• Open High School System Act na naglalayong ang edukasyong sekondarya ay makuha ng mga mamamayang hindi nakapag-aral o nakapagtapos ng elementarya.
• National Student Loan Program para makatulong sa matrikula ng mga nangangailangan na makapag aral.
• Pagpapasa ng resolusyon upang magkaroon ng malinaw na ukol sa Coco Levy dahil malaking porsyento ng taga Quezon ang makikinabang dito.
• Reforestation ng Bundok Banahaw.
• Pagrebisa ng Fisheries Code dahil marami sa mga panukala dito ay hindi na naaayon sa kasalukuyang panahon.
• Pagtanggal ng Export Permit sa mga produktong pang-agrikultura upang mapadali ang export process para sa ating mga magsasaka upang maiwasan ang pagkabulok ng mga produktong gulay sa sobrang dami ng rekwisitos na kailangang pagdaanan.
• Pagsusulong ng Hazardous & Radioactive Wastes Management Act upang maiwasan ang mga lason na nagdudulot ng karamdaman sa ating kalusugan.
• Pagtatalaga ng mga Legal Representation sa lahat ng embassy para may mahingan ng tulong ang mga OFW sa iba't- ibang bansa.

Ito po ang aking munting pangarap para sa ating distrito na maaring maisakatuparan kung ako po'y inyong pagkakatiwalaan tulad ng suportang ibinigay nyo sa aking ama sa mga nakalipas na panahon. Kasama ang iba pang lokal na kandidato.

SAMA-SAMA TAYONG LUMABAN PARA UMASENSO ANG ATING BAYAN!