Barangay Road sa Bukal Sur, Sukli sa Pagtitiwala ng mga Mamamayan

Isa na namang barangay road ang opisyal na binuksan sa bayan ng Candelaria. Naglaan ng P1 milyon si Cong. Irvin M. Alcala para sa barangay road sa Bukal Sur. Kaagipay ang DPWH District Engineer’s Office, natapos sa wastong oras ang pagpapagawa ng 125-metrong kalsada na layuning pabilisin ang daloy ng trapiko sa lugar.

Mapapansing kaliwa’t-kanan ang mga proyektong pang imprastraktura sa segunda distrito sa mga nakalipas na mga buwan. Ito ay dahil sa pangako ng representante na makapagbigay serbisyo sa buong distritong pinamumunuan.

Nagmula sa pork barrel ang nasabing barangay road at siya namang ipinagmalaki ng kongresista. Aniya, hindi napupunta sa kung saan lang ang mga pondong ipinagkakaloob sa kanya kundi “nakikita at nadarama sa buong distrito.”

Bilang pabirong hirit sa mga dumalo sa inagurasyon ay hinikayat niya ang mga ito upang magbayad ng wastong buwis bago magtapos ang  deadline na ito. “Sa ganoong paraan po ay mayroon tayong magagamit na pondo para sa mga proyekto dito sa ating minamahal na distrito” dagdag ng kongresista.

Lubos din ang pagpapasalamat ng representante sa mga nasasakupang constituents sa patuloy na pagbuhos ng pagtitiwala at kooperasyon sa mga proyektong bayan. Sa paniniwala sa tapat na paglilingkod at pakikipag-isa sa mga mamamayan napatunayan ang subok at taos-pusong serbisyo publiko sa segunda distrito.

| More...