Bagong Classroom Building sa Sampaloc II Elementary School, Opisyal nang Binuksan para sa Pasukan

Sampaloc II Elementary School Inauguration

Isang magandang pagbubukas ng school year ang handog sa mga mag-aaral ng Sampaloc II Elementary School sa bayan ng Sariaya. Opisyal nang binuksan ang kanilang school building na ipinagkaloob sa kanila ng SM Foundation. Nabiyayaan ang nasabing paaralan sa pamumuno ni Cong. Irvin M. Alcala, representante ng segunda distrito ng Quezon.

Naganap ang ribbon cutting ceremony noong ika-7 ng Hunyo. Pinangunahan ni Cong. Irvin Alcala ang inagurasyon ng proyektong school building.

Nagmula sa ideya ng maayos na pag-aaral ang kwento ng nasabing proyekto. Dahil sa mismong highway nakalagi ang paaralan ay napansin ni Cong. Irvin ang mga estudyante ng Sampaloc II na nagtitiyagang magklase sa isang covered court. Hindi rin nakakatulong ang usok mula sa mga sasakyang dumadaan sa harap ng eskwelahan. Dahil sa nakitang ito, inilapit ng representante ang kalagayan ng mga mag-aaral sa SM Foundation upang idulog ang hirap ng mga estudyante para lamang makapag-aral. Nagkataon namang daliang nabigyang katuparan ang hiling ng mga mag-aaral.

Bukod sa school building na mayroong dalawang class rooms, nagbigay rin ang foundation ng 100 libro at isang set ng personal computer at printer para magamit ng mga guro at estudyante. Batid ang saya sa ngiti ng mga estudyante at mga guro habang ginagawa ang opisyal na unveiling ng building at mga iba pang donations sa paaralan.

Hindi dapat maging hadlang ang mga problema sa maayos na pag-aaral ng mga estudyante sa segunda distrito. Sa pagbibigay ng bagong pag-asa sa mga estudyante, inaasahang mas magiging masaya ang pag-aaral ng mga ito sa kanilang mga bagong classrooms, computers at mga libro. Sa maayos na paglalaan ng atensyon at patuloy na pakikipagtulungan sa iba pang sektor ay higit na makakatulong sa mga nangangailangan. Totoong serbisyo publiko at de kalidad na trabaho, alay sa mga partner-constituents sa segunda distrito.

| More...